Sáttmáli undirskrivaður um tilbúgvingarstøð

Í morgun varð sáttmáli undirskrivaður um byggingina av nýggjari tilbúgvingarstøð í Eysturkommunu. Tilbúgvingarstøðin verður niðan ímóti høvuðsvegnum á gomlu ferjuleguni í Leirvík og verður 600 fermetrar til støddar.

Býráðið samtykti á seinasta býráðsfundi at fara í holt við byggingina, og í morgun varð sáttmáli undirskrivaður við KBH, El-Teknik og Zacharias Leitisstein, ið áttu lægstu tilboðini uppá ávikavist jørð-, kloakk-, betong-, timbur-, málara- og gólváleggingararbeiði, Zacharias Leitisstein uppá HVS- og ventilatiónsarbeiði, og El-Teknik uppá el-arbeiði.

Samlaði kostnaðurin av nýggju tilbúgvingarstøðini er mettur at verða 11.499.000 kr. Byrjað verður eftir ársskifti og eftir ætlan verður liðugt síðst í 2018.

Stórur tørvur á betri umstøðum til sløkkiliðið

Tørvurin á tilbúgvingarstøð er stórur, staðfestir Sørin S. Djurhuus, tilbúgvingarleiðari í Eysturkommunu. Sløkkiliðið leigar seg í løtuni inn í hølir í Leirvík, og útgerð hjá sløkkiliðinum er á goymslu ymsastaðni í kommununi.

Nýggja tilbúgvingarstøðin gevur sløkkiliðinum munandi betri umstøður at arbeiða undir, og samlar alla tilbúgvingarútgerð á einum stað. Samstundis kann nýggi bygningurin brúkast sum ein miðstøð, tá tilbúgvingin verður sett í gongd og sløkkiliðið verður kallað út.