Í dag varð sáttmáli undirskrivaður við MT Højgaard um arbeiðið at byggja nýggja dagstovnin við Gøtugjógv. Nýggi dagstovnurin hevur pláss til 112 børn og tekur 18 mánaðir at byggja. Samlaði kostnaðurin fyri verkætlanina er 54 mió. kr.
Í næstum verður projekt-gjøgnumgongd og uppstartsfundur, og síðan verður gjørt klárt til at fara í gongd.
Námsfrøðiliga arbeiðið hjá dagstovninum Gjáa fær stóran íblástur úr Reggio Emilia arbeiðsháttinum – at lurta eftir barninum og hugsa tað kreativt inn í føroyska mentan. Byggingin av nýggja dagstovninum hevur í øllum lutum tikið støði í teimum grundarsteinum, sum stovnurin hevur orðað og arbeitt eftir í mong ár.
Somuleiðis vera tey avbjóðandi lendisviðurskiftini í økinum sæð sum ein viðspælari heldur enn ein trupulleiki. Bygningur og garður eru skapt sum ein náttúrulig eind, sum tekur støði í júst hesum stað, og tí ikki kundi verið skapt undir øðrum umstøðum enn júst hesum.
Tað hevur havt alstóran týdning í tilgongdini, at bygningur og uttanumøkið er ein samansjóða eind av javnbjóðis pørtum.
Parkeringsøkið, sum á konsept-tekningunum er á takinum, er flutt.
Spæliøkið sunnanfyri ánna, sum eisini sæst á konsept-tekningunum, er heldur ikki tikið við í hesari byggiverkætlan.