Hvussu kunnu vit saman forða fyri at skøran sleppur at spreiða seg

Hetta er tíðin, tá skøran stendur í besta blóma. Vøkur kann hon tykjast á at líta, men hon skapar stórar avbjóðingar um hon ótarnaða sleppur at vaksa. Skøran spjaðir seg sera skjótt. Hon køvir annan lægri vøkstur og kann leggja stór økir undir seg eftir stuttari tíð.
Tí er umráðandi, at skøran verður tikin upp ella týnd. Hetta er galdandi á egnum øki, vegnum, gøtum og á traðum ymsa staðni í kommununi.

Hetta kunnu vit gera fyri at forða fyri at skøran sleppur at vaksa og nørast:

  • taka skøruna upp við rót
  • skera eldri plantur, sum blóma og seta fræ, niður. Avskurðurin skal í gráa posan frá IRF saman við vanligum húsarhaldsruski, sum fer til brenningar. Hetta er eisini galdandi fyri tað, sum er tikið upp við rót
  • skøran má ikki koyrast til kompostering, tí tá beiðir hon seg aftur við fræ
  • tað verður ikki rátt fólki til at brúka gift ella salt móti skøruni, tí hetta kann ávirka annan gróður og umhvørvið annars
  • har, sum man hevur tikið skøruna upp, kann tað, um tað er møguligt, verða skilagott at sáa ella planta við øðrum vøkstri, og soleiðis forða fyri, at skøran ikki festur seg aftur.

Man kann eisini taka blomstrini og burturbeina tey. Hetta ger, at tá eru eingi fræ og kann plantan tá ikki nørast, rótin fær ikki føði og doyr.
Tað er umráðandi, at vit í felag kunnu halda vøksturin á skøruni niðri, soleiðis at hon ikki ger óneyðugan skaða á okkara umhvørvi. Tí heitir kommunan á borgara um at forða fyri at skøran sleppur at vaksa og nørast á egnum privatum øki, meðan kommunan tekur sær av kommunalum økjum. Tað er bert vit, sum kunnu gera nakað við hetta, tí hvørki seyður, neyt ella onnur djór eta skøru.
Borgarar, sum leggja til merkis at skøran spreiðir seg á kommunalum øki eru vælkomin at boða kommununi frá á tlf. 730000 ella senda ein teldupost til eystur@eystur.fo