Sinnisbati: Time Out

Seinasta heyst byrjaði Sinnisbati uppá eina nýggja verkætlan. Verkætlanin snýr seg um, at lætta og bøta um korini hjá avvarðandi at fólki við sálarsjúku, við at skipa fyri avvarðandi bólkum. Felagsskapurin hevur nú skipað fyri trimum avvarðandi bólkum, afturmeldingarnar frá teimum, ið hava verið i bólki, eru sera góðar.

Hesi bólkarnir hava verið rættaðir móti vaksnum, men aftaná summar verður fyrsti avvarðandi bólkurin fyri børn og ung millum 7-18 ár. Bólkarnir verða stuðlaðir av tveimum fakfólkum, sum hava serkunnleika innan økið.

Um mamman ella pápin hava sálarsjúku, kann tað verða trupult at vera barn, og tað kann eisini verða torført at tosa við vinfólk ella familjun um tað. Somuleiðis kann tað vera ringt at vera systkin at einum, sum hevur sálarligar avbjóðingar, tí hetta ofta fyllir nógv hjá allari familjuni.

Tilboðið hjá Sinnisbata er eitt “hvílirúm” hjá børnum og ungum, har tey fáa eitt stað, har tað ber til at tosa við onnur í líknandi støðum, og saman við stuðlandi fakfólkum. Tilboðið eitur “Time Out”, tí hetta er staðið, har tey ungu kunnu siga “time out” frá gerandisdegnum og slappa av, tosa um tingini, deila royndir, men eisini eitt stað, har tey kunnu hava tað stuttligt saman og hugna sær.

Sinnisbati ynskir, at so nógv fólk sum møguligt fáa kunning um “Time Out”, so tey, sum hava hug og tørv á tí, kunnu fáa eitt pláss í fyrsta bólkinum, sum byrjar mikudagin 21. september kl. 16-18 í hølunum hjá Sinnisbata. Har eru avmarkað pláss í bólkinum, so tilmelding fer fram eftir “først til mølle”-prinsippinum.

Til ber at lesa meira um tilboðið, og melda seg til umvegis tilmeldingarskjalið á heimasíðuni hjá Sinnisbata. Um tú hevur spurningar hesum viðvíkjandi, kanst tú ringja til Sinnisbata á tlf. 59 7913 ella skriva á sinnisbati@sinnisbati.fo ella umvegis Facebook.

Sinnisbati