Vinnunevndin vitjar Tónleikaútflutingsstovuna

Fríggjadagin var Vinnunevndin á vitjan hjá Føroysku Tónleikaútflutningsstovuni – Faroe Music Export – sum liggur í Syðrugøtu í sama bygningi sum m.a. skrivstovan hjá G! Festivalinum húsast í. 

Gissur Patursson, stýrisformaður, og Fred Ruddick, leiðari, greiddu frá virkseminum síðani stovnan í 2019; frá raðfestingum í mun til tann stóra tørvin á vinnumenning í einum so virknum tónleikaumhvørvi sum tí føroyska; men eisini frá nøkrum av avbjóðingunum, sum farsóttarfyrilitini elva til hjá føroyskum tónleikarum, fyriskiparum og øðrum í hesi fjølbroyttu vinnu.

Sum skilst eru nógvir møguleikar fyri framman fyri føroyskan tónleik, og arbeiðast má miðvíst fyri betri marknaðaratgongd, fyri røttum sýnisgluggum og líknandi – eisini í broyttu umstøðunum, sum krevja munandi umlegging.

Vit ynskja FMX góðan arbeiðhug framhaldandi við at fáa føroyskan tónleik longur út í heim og við øllum uppgávunum føroysku tónleikavinnuni at frama. Eysturkommuna vil framhaldandi samstarva væl við Tónleikaútflutningsstovuna og stuðla undir virksemið saman við lokala tónleikaumhvørvinum.

Heimasíðan hjá FMX kann vitjast her: https://fmx.fo/

Myndatekstur: Frá vinstru Fred Ruddick, leiðari á FMX, Hanna Jensen, forkvinna í Vinnunevndini, og Gissur Patrusson, stýrisformaður fyri FMX. Á myndini vanta Gudný Langgaard og Hjalti Dalheim, nevndarlimir í Vinnunevndini í Eysturkommunu.