Væleydnað røktar- og heilsubreyt

Sum ein liður í at útvega starvsfólk til eldraøkið gjørdi undanfarni leiðari fyri Nánd, Kristina T. Larsen, avtalu við Fuglafjarðar Skúla um eina royndarætlan við eini Røktar- og heilsubreyt skúlaárið 2019/2020.

Endamálið við Røktar- og heilsubreytini er at geva næmingum kunnleika í at arbeiða við og læra um m.a. røkt, umsorgan, heilsu, fyribyrging og endurvenjing.                                                                                                                                               

Breytin fevndi um 7 skúladagar við undirvísing og 11 dagar við starvsvenjing á deildunum hjá Nánd.

Innihaldið av undirvísingini fevndi um hesi evni:  

• Tagnarskylda
• Hondreinføri
• At eldast
• Vitjan á Sjóndepilinum
• Samskifti
• Umsorgan
• Lívssøga
• Demens
• Fyribyrgjan, rørsla, endurvenjing
• Stjørnuløtur
• Hjartastartarar

Tað vóru Annika Breiðaskarð, heilsurøktari og Anna á Reynatrøð, sjúkrarøktarfrøðingur, sum vegna Nánd samskipaðu breytina.

Royndarætlanin við breytini eydnaðist væl, og 4. mai 2020 fingu næmingarnir handað váttan um luttøku á Røktar- og heilsubreytini og í at nýta hjartastartarar.  Ætlanin er, at hetta aftur verður ein valmøguleiki komandi skúlaár.

Ein av næmingunum byrjar á Heilsuskúlanum í Suðuroy, og aðrir hava valt fyrst at fara á Miðnám á Kambsdali og fara møguliga víðari innan røktar og heilsufakið seinni.

Tykkum verður ynskt hjartaliga til lukku við luttøkuni á breytini og blíðan byr.