Summartónar í Tøting

23. jun. 2015

Fríggjakvøldið 26. juni kl. 20.30 er Tøting karmur um eina konsert við Stanley Samuelsen, ið kemur at fjálga um hetta summarkvøld saman við dugnaliga bygdamanni sínum Helga Midjord í Tøting og unga gittarúrmælinginum Alva Joensen. Tónleikasamtakið Grót skipar fyri konsertini.

Stanley hevur við síni drúgvu tónlistarligu yrkisleið og dugnasemi av røttum vunnið seg djúpt inní kjarnuna á føroysku fólkasálini. Við sínum seks útgávum sum eitt framúr tónaskald, lag og teksthøvundur, umframt sítt meistarliga handverk á gittarinum, kunnu áhoyrararnir trygt seta seg djúpt í sofurnar og lenistólarnir í Tøting og njóta hesa uppliving.

Afturat sær hetta kvøldið hevur Stanley fingið sera dugnaliga danska bassleikaran Jens Jefsen, ið sjálvur eisini hevur eina drúgva og glæsiliga tónleikaliga yrkisleið við millum annað 8 solo útgávum, umframt at verða ein kendur og virdur bassleikari úti í stóru verð.

Helgi Midjord, sum eins og Stanley er Fuglfirðingur, er ein sera dugnaligur fjøllistamaður, hvørs hendur og hugflog hava dugna til mong framúr listarverk, bæði við pensli, høggijarni og plektara. Fríggjakvøldið verður tað plektarin ið verður drigin upp úr hattinum, umframt at vit nokk eisini fáa nakrar av hansara vøkru málningum at prýða pallin.

Afturat teimun báðum fólkakæru tónleikarunum luttekur eisini unga supertalenti og gittarúrmælingurin Alva Joensen úr Gøtu. Alvi vann klassisku talent-kappingina Stella Polaris í vetur. Hann er í løtuni búðsitandi í Danmark í samband við tónleikaútbúgving.

Her sæst Stanley Samuelsen framføra í Haldórsvík.