Skráin til G! er komin út

Nú eru bert nakrir fáir dagar til G! festivalurin byrjar, og skráin til ársins tónleikaveistlu í Eysturkommunu er almannakunngjørd.

Vit skulu 3 ár aftur fyri at minnast seinasta festival, har Syðrugøta var á tremur við fólki í góðum festival-hýri. Nú verður tað endiliga aftur. Og hetta árið er eisini serstakt, tí tað eru 20 ár síðan fyrsti G! festivalur varð hildin í Syðrugøtu í 2002.

Mong eru stjørnuskotini, sum hava vitja og spælt í Syðrugøtu ígjøgnum árini – og fleiri tónleikaneistar eru kveiktir á Gøtusandi, í grundini og á spæliplássinum í Syðrugøtu. Í ár verður enn einaferð borðreitt við eini fjølbroyttari skrá til øll oyru og sæst hon niðanfyri.