Back
Tíðindi
Jóannis Kristiansen, Leirvík 1962
Skrivað tann 12. februar 2018

Jóannis Kristiansen 100 ár

12. februar eru 100 ár síðani, at kendi Leirvíksmálarin, Jóannis Kristiansen, varð føddur. Jóannis Kristiansen kom úr Leirvík, og flestu málningarnir hjá honum eru av bygdini og nærumhvørvinum. Málningarnir av Sigatindi, Djúpunum og Leirvíksfjalli eru eyðmerktir av tí føroyska ljósinum og landslagnum.

Tíðliga steig Jóannis Kristiansen av tí traðkaðu gøtuni. Áhugin fyri list var stórur, og sum tannáringur teknaði og málaði hann nógv. Tá hann var seytjan, fór hann til Danmarkar at útbúgva seg til bygningsmálara. Í 1944 kom hann inn á Kunstakademiið í Keypmannahavn, samstundis sum Ingálvur av Reyni. Teir høvdu Aksel Jørgensen sum professara, og her lærdi Jóannis Kristiansen at brúka litirnir, sum gjørdust eyðkennið hjá honum, til at skapa rúmd í myndunum.

Listin hjá Jóannis Kristiansen hevur impressionistisk drøg. Skiftandi veðurlagið og føroyska ljósið eru berandi í listini. Hann brúkar serliga blátt, gult, grønt og hvítt. Vetrarmyndirnar eru bláligar og hvítar. Geislandi hvíta, kavaklædda landslagið er bjart og kulisligt. Vármyndirnar eru grønar og sitróngular, og sólarljósið er sterkt og frískligt. Málningarnir eru fyltir við ljósi, luft og lívi.

Í 1948 var Jóannis Kristiansen liðugur á Kunstakademiinum, men fyri at hava til dagin og vegin, arbeiddi hann eisini sum málarasveinur í Keypmannahavn. Tilknýtið til Danmarkar gjørdist eisini sterkari tá hann hitti Else Margrethe Bonke úr Hvidklide, Lollandi, og tey blivu gift í 1967. Jóannis Kristiansen var búsitandi í Danmark til hann doyði í 1988.

Jóannis Kristiansen ferðaðist til Føroyar hvørja ferð hann fekk møguleikan, og sjálvt um hann búði í Danmark, hevði føroyska landslagið eitt serligt pláss í list og hjarta hansara.

Leirvík 1962

 

Inni á Nesi, 1967

 

Kavamynd 1968