Back

Fyribyrging

Heimavitjan 75 ár og eldri

Fyribyrgjandi heimavitjanir er eitt tilboð til fólk, ið eru 75 ár og eldri, ið ikki fáa tænastu frá Nánd frammanundan. Endamálið er at skapa tryggleika og trivnað, stuðla frískum eldri at vera verandi frísk og at fyribyrgja, at smáir trupulleikar gerast stórir. Nánd bjóðar heimavitjan einaferð um árið. Tær nýtist ikki at hava trupulleikar fyri at fáa vitjan. Tekur tú av tilboðnum, fært tú vitjan av einum starvsfólki, sum hevur heilsufakliga útbúgving og royndir í at starvast við eldri fólki.

Tú kanst fáa meira at vita um tilboðið, við at venda tær til Nánd á tlf. 730 200

Sjálvsvenjing

Nánd ynskir at skapa karmar fyri, at eldri fólk kunnu fremja egi fyribyrgjandi átak, so tey kunnu hava eitt sunt og virkið lív. Við at bjóða tilboð til sjálvsvenjing, gevur Nánd møguleika til fólk í aldrinum 67 ár og eldri, at ganga til venjing og fáa sær eitt prát og møguliga ein drekkamunn.

Hvør kann sjálvsvenja?
Um tú býrt í Fuglafjarðar kommunu ella í Eysturkommunu, og tú er í aldrinum 67 ár ella meira, so hevur tú møguleika at melda teg til sjálvsvenjing.

Hvussu kann ein sjálvsvenja?
Í nýggju hølunum í Leirvík og í hølunum hjá Kappróðrarfelagnum í Fuglafirði eru ymisk venjingartól, har tú kanst venja. Tit hava sjálvi ábyrgdina av at ganga væl um hølini og at rudda upp eftir tykkum. Eftir nærri avtalu við Nánd tlf. 730 200 kanst tú spyrja um at fáa vegleiðing frá fysioterapeuti.

Hvar og nær kann ein sjálvsvenja?
Leirvík:
Hølið hjá Nánd liggur við síðuna av kirkjuni.

Hósdag frá: 09.00 – 12.00
Týsdag frá: 09.00 – 12.00

Hvat er kostnaðurin fyri at venja í Leirvík?
Tað er ókeypis at venja í venjingarhølunum í Leirvík.

Hvussu kann ein byrja?
Til ber at melda seg til sjálvsvenjing í Leirvík, við at ringja til Nánd tlf. 730 200.

Fuglafjørður:
Kappróðrarneystið liggur niðanfyri Keypssamtøkuna.

Mánadag frá: 09.30 – 13.00
Mikudag frá: 09.30 – 13.00
Fríggjadag frá: 09.30 – 13.00

Hvat er kostnaðurin í Fuglafirði?
Tað kostar kr. 20,- fyri hvørja uppmøting umframt eitt árligt limagjald áljóðandi kr. 125,-. Gjøldini fara til kappróðrarfelagið.

Tú ert vælkomin at vitja í hølunum og hyggja teg um, áðrenn tú byrjar.

Hvussu kann ein byrja?
Tú møtir bara upp, og meldar til hjá kappróðrarfelagnum.

Mattænasta

Tænastan er ein liður í at fremja heilsugóðan kost, til fólk í økinum, ið ikki megna at matgera døgurða, ið ikki hava møguleika at fáa hjálp frá avvarðandi, og annars ikki hava møguleika at fara á matstøð at keypa døgurða. Kostnaðurin er kr. 40,- fyri hvønn døgurða, íroknað útkoyring.

Tú kanst søkja um at fáa døgurða, við at venda tær til skrivstovuna hjá Nánd á tlf. 730 200.